1. Mr wolln
unnere Mutterschprohch vor Verfall retten, se flahng un wieder zur Allgemängaltung bringe. Net bluhß, weil se ä Erbschtick von unnere Vehter har is un weils ehrlus von uns gehannelt war, dos zugrund giehn zu lohßen, sunnern ahch desserhalleb, weil mr mit unnerer Mutterschprohch es Allerähngste an uns un unnern Vollekstum aufgahn wiern. Muhs ahch immer sei, wolln rnr ewerharzersch mitännanner schprachen un dodrinne unnere Ehr sahn. Mr wolln ahch dodrfier sorring, doß de Kinner wieder Mundart larne. Bluhß dumme Menschen verlächeln un verachten ihre Mutterschprohch'.

2. Mr wolln
unsere alten Sitten un Gebreiche hehng, se unterschtitzen un als wartvulles Volleksgut net bluhß dr Juhngd iewerlohßen, sunnern - wies in alten Zeiten gewasen is un wie sichs gehört - uns wieder allgemän drahn betähling.

3. Mr wolln
dn Zusammehalt aller Ewerharzer als Schprohch- un Schtammesverwandte un als Kinner dar gleihng Heimot flahng, indann mr uns alle Jahr än- oder zwä mol in äner Barkschtadt traffen. De Rehch dr Zusammekunneftsorte ward dorrich dn Luhs beschtimmt. Disse Traffen, dan jedsmohl ä besunnerer Kern gegahn ward, missen zu Volleksfesten in frehlichsten ewerharzischen Sinn warn.

4. Mr wolln
an Winterohmde, oder wenn sich sinst Gelahnghät biet, Viertrehg iewer dr Geschichte unnerr Heimot harn, de Vergangehät von gansen Ewerharz kenne larne un dodrmit de Entwicklung verschtiehn, die unnere Gehngd un unner Vollekstum dorrichgemocht hot. Je besser doßde deine Heimot kennst, je mehr hostse lieb!

5. Mr wolln
dos Bild unnerer Heimot - de ewerharzische Landschaft - vor Verschannelung schitzen, mr wolln driewer wachen, doß do nischt neingepfuscht wärd, wos net neingehört, weil unnere Natur ä Schtick von unnern Brüht is un weil uns kä Fremder meh besucht, wenner äne verhunste Gehngd vierfindt. Mr wolln ahch drahn denken, doß äne Barkschtadt an schänsten is, wense sich salwer trei bleit, un net lächerlicherweise "Klän-Berlin" vierschtelln will!

6. Mr wolln
unnsere alten Lieder wieder singe, se zu Papier bränge;
mr wolln iewerhaupt Lied un Musik flahng, wus mant erring tmehchlich is. Musik un Gesang han all seit alle Zeiten zu uns gehört wie äne Selbstverschtändlichkät. Su musses bleihm, un jedes neie Barkamt soll dodrim zuärscht vor äner lusting Singschar sorring. Juitarrn, Bloseballich, Mundharmonika, Harzzither, Geign un Mandoline messen viergehult warn. Schtreng ower muß drauf gesahn warn, doß de Musikgruppen aus ihrer Kunst kä Geschäft un sich gehngseitich käne Konkurrenz mochen. Mr wolln mitänanner - ower net gehngänanner – arreben!

7. Mr wolln
zu gelahngner Zeit drahn denken, alte Schprichwerter, alte Ewerharzer "Schtippschterichen", zu sammeln un niederzuschreim, ahch Redensarten, Schaltwerter un ähnliches, weil sechs alte Volleksgut mitunter viel zu sahn wäß un kulturgeschichtlich wartvull is. Ahch unnsere Flurname wolln mr sammeln - seche, die noch beschtiehn un seche, die bluhß nach de Alten kenne. Mannicher Flurnam is ä Buch Geschichte vor sich!

8. Mr wolln
uns unteränanner mit "Glickauf* hegrießen, .weil mr mit dissen Gruß de Erinnerung an dr beriehmten Vergangehät von Ewerharz un an iewer 400 Jahr ewerharzischen Barkbau aufracht halten. Dodrmit setzen mr unnere Alten, die ihr Lahm dn Barkbau geoppert han, ä lebendiches, sinnvolles un ähnzichartiches Denkmol!

9. Mr wolln
uns ahch nohch außen als Ewerharzer bekenne, indann mr ähnge Tracht trahn. Se wärd uns als Landsleit enger zusammebinden un soll nohch un nohch alle Allerwaltskonfektzjon un alln iewerflissing un bluhß Gald kostenden Kram verdränge. Se wärd ahch off dn Fremdenverkähr än guten Einfluß han un als wärtschaftliche Sallebsthillef von Nutzen sein, weil viel Zutohten drzu bei uns salwer hargeschtellt warn känne.